…Yn Y Gadair. Mae cyflwynwyr Pethe wedi bod yn eistedd mewn cadeiriau dychmygol (a rhai go iawn, beryg!) i ateb rhai o’r cwestiynau sy’n wynebu ein gwesteion arbennig wythnosol.
Nia Roberts
Sut fyddet ti’n disgrifio dy hun? Cymraes.
Sut fyddai eraill yn dy ddisgrifio? “Un o’r petha Gwlad y Medra ‘na!”
Ymhle faset ti’n gosod y gadair a pham? Ar Draeth Benllech. Dyma nghartre i a dwi’n berson hapusach os ‘di ‘nhraed i mewn tywod.
Pwy neu be’ fu’r ddylanwad mwya? Fy Mam a Nhad.
Y gwaith rwyt ti mwyaf balch ohono? Anodd dewis un rhaglen neu gyfres ar y teledu. Ond dwi’n reit falch o’r ffaith ‘mod i wedi cynnal sioe ddyddiol ar Radio Cymru ers 20 mlynedd bellach. (Ac yn falch IAWN o fod yn ferch sy ‘di cyflwyno rhaglen bob dydd ar Radio Cymru ers 1992)
Beth yw’r cyngor gorau ges ti? Wnes ti wrando? ‘Gwna fo efo gwên’. Do.
Os mai bocs sebon fyddai’r gadair, beth fydde dy bregeth? Mae’n codi ngwrychyn i pan glywai Gymraeg gwael ar y Cyfryngau yng Nghymru. Mae’n fraint cael darlledu a phrif arf y Darlledwr ydi geiriau. Dylai ddysgu eu defnyddio, felly, yn gywir. Petai Plymar neu Saer neu Adeiladwr yn methu defnyddio ei offer, fasa fo neu hi ddim yn cael y gwaith na fasa?
Y gogledd neu’r De? Gogledd
Llyfr papur neu e-lyfr? Llyfr Papur
Facebook neu Twitter? Yr un o’r ddau
Lle hoffet ti fod fory? Yn Collioure , yn ardal Pyrenees- Orientales,de Ffrainc, ar lan Mor y Canoldir
Rhun ap Iorwerth
Sut fyddet ti’n disgrifio dy hun? Ar fy ngorau? Brwdfrydig, positif, hapus (y rhan fwyaf o’r amser) a teg, gobeithio.
Sut fyddai eraill yn dy ddisgrifio? Fel un sy’n siarad gormod efallai!
Ymhle faset ti’n gosod y gadair a pham? Yn yr ardd yn Sir Fon, yn edrych draw am Eryri. Rwy’n hapus yno, ac mae’r olygfa mor fawr ac eang, dwi’n teimlo presenoldeb Cymru i gyd yno rywsut.
Pwy neu be’ fu’r ddylanwad mwya?
Yr ateb amlwg yw fy rhieni, nhw fu’r mwyaf dylanwadol arnaf erioed. Ond yn broffesiynol rwyf wedi cael gweithio efo sawl un – Guto Harri, Vaughan Roderick a Sian Pari Huws i enwi tri o’r pwysicaf – yr wyf wedi cael addysg amhrisiadwy ganddyn nhw.Y gwaith rwyt ti mwyaf balch ohono?
Anodd meddwl am un peth, ond mae sawl stori yr wyf wedi gweithio arnyn nhw fel gohebydd neu raglenni yr ydw i wedi eu cyflwyno, wedi bod yn her – wedi bod yn drist iawn weithio – sydd wedi rhoi boddhad mawr i mi, o 9/11 yn Efrog Newydd, i wahanol refferenda ac etholiadau, i’r drasiedi ddiweddar yng nglofa’r Gleision. Rwy’n falch iawn, iawn hefyd o fod wedi cael bod yn rhan o’r tim cyflwyno yn yr Eisteddfod Genedlaethol ers sawl blwyddyn bellach. Mae’n braf gweithio ar rywbeth sy’n golygu llawer i fi’n bersonol.Beth yw’r cyngor gorau ges ti? Wnes ti wrando?
Gwna dy orau. Dwi’n gobeithio mod i’n rhoi fy ngorau bob tro.Os mai bocs sebon fyddai’r gadair, beth fydde dy bregeth? Peidiwch a thaflu ysbwriel ‘fast food’ allan o ffenest eich car! Mae rhywun sy’n byw yn agos atom ni yn taflu ysbwriael yn yr un lle o hyd (h.y. y pellter mae’n ei gyrraedd ar ol bod yn McDonalds a gorffen ei bryd bwyd wrth yrru). Pwy bynnag wyt ti – stopia! A pheidiwch a thaflu gwm cnoi ar y pafin. Nid mod i’n ‘grumpy old man’, ond rhowch 10 munud i fi, a dwi’n siwr y meddylia’ i am betha eraill i gael cwyn yn eu cylch!
Beth sy’n dy wylltio di am Gymru? Cymry Cymraeg yn credu nad yw eu Cymraeg yn ddigon da. Rhaid i bawb allu teimlo’n gyfforddus efo’r iaith maen nhw’n eu siarad. Rhaid i ni wneud mwy, efallai, i brofi yr hyn yr wyf i’n teimlo’n gryf iawn yn ei gylch, sef nad oes yna unrhywbeth ‘snobyddlyd’ O GWBL mewn siarad Cymraeg. Sawl un sydd wedi dweud dros y blynyddoedd, mewn Cymraeg perffaith, “Alla’ i ddim gwneud cyfweliad, dyw ‘Nghymraeg i ddim digon da!!” Hefyd pobl sydd a diffyg hyder yn eu Cenedl.
Y gogledd neu’r De? Rwy’n falch iawn o ddweud “y ddau”. Cefais fy ngeni ym Mhontypridd a fy magu yn Sir Feirionnydd a Sir Fon. Rwyf wedi byw am flynyddoedd fel oedolyn yng Nghaerdydd, mae fy nghartref bellach ym Mon, ond rwyn gweithio yn y ddau le, a chyn hapused yn y ddau le.
Llyfr papur neu e-lyfr? Llyfr papur, am y rheswm syml nad ydw i wedi darllen llyfr ar declyn electronig eto. Rwy’n mwynhau’r profiad o fodio drwy lyfr go iawn.
Facebook neu Twitter? Twitter - mae’n symlach ac yn fwy uniongyrchol. Ond mae popeth rwy’n ei drydar yn ymddangos ar Facebook hefyd, ac rwy’n cael mwy o ymateb drwy hwnnw yn aml.
Lle hoffet ti fod fory? Ar lethr sgio gyda teulu a ffrindiau – alla’ i byth gael digon o sgio! Neu Califfornia falle. Neu ar ben yr Wyddfa os ydi hi’n braf. Neu ar y Fenai mewn canw. A dweud y gwir, fe allai’r rhestr yma fod yn un hir iawn!!