Bydd albwm nesa’ Mr Huw ’Cariad Afiach’ allan ar yr 22ain o Orffennaf. 

Bydd hefyd i’w weld yn perfformio yn y llefydd canlynol:- Maesgeirchen (Mehefin 7fed) / Caerfyrddin (Mehefin 22ain) / Gwyl Bailey Hill, Yr Wyddgrug (Mehefin 23ain) / Blaenau Ffestiniog (Gorffennaf13eg) / Gwyl Blissfields (Mehefin 5ed-7fed) / Gwyl Cockrock (Gorffennaf 19eg-21ain) / Gwyl Gardd Goll (Gorffennaf 27ain-28ain) / Steddfod (Awst 7fed) / Gwyl Sŵn (Hydref 17eg-21ain)

Gwrandewch fan hyn

Neu

Tanysgrifiwch ar iTunes

Mae’r cyhoeddiad yn dod o Lyfrgell Ganolog Caerdydd ac Alun Gibbard a Jasper Fforde, dau o feirniaid y gystadleuaeth eleni, sy’n ymuno hefo Lisa Gwilym i drafod y gystadleuaeth.

Barddoniaeth

Trydar mewn Trawiadau

Llion Jones (Cyhoeddiadau Barddas)

Her Twitter yw crynhoi ein hynt a’n helynt i 140 o nodau cyfrifiadurol. Gosododd Llion Jones her ychwanegol iddo’i hun trwy ddewis trydar mewn cynghanedd yn unig. Mae’r gyfrol unigryw hon yn ddetholiad o’i drydar cynganeddol dros y tair blynedd diwethaf.

Parlwr Bach

Eigra Lewis Roberts (Gwasg Gomer)

Yn Parlwr Bach, profir holl liwiau a gwead bywyd a chlywir lleisiau’r wynebau a gasglwyd yn ffotograffau ffigurol ar silff ben tân ei pharlwr bach personol. Dyma’r bobl a’r mannau a gafodd argraff ar y bardd a’i symbylu i ddefnyddio deunydd crai geiriau i greu darluniau byw ei cherddi.

O Annwn i Geltia

Aneirin Karadog (Cyhoeddiadau Barddas)

Yn ei gyfrol gyntaf o gerddi aiff Aneirin Karadog ar daith o bydew Annwn i Dir Neb, ac yna ymlaen i Geltia lle mae’n dod o hyd i’w hunaniaeth. Mae profiad a hyder y bardd fel perfformiwr yn amlwg wrth iddo drosglwyddo rhythmau newydd i hen fesurau’r gynghanedd.

Ffuglen

Blasu

Manon Steffan Ros (Y Lolfa)

Wrth edrych yn ôl ar ei bywyd, a’r teulu a’r ffrindiau a fu’n gwmni iddi ar hyd y daith, daw blasau o’r gorffennol i brocio atgofion Pegi. Ond nid yw pob atgof yn felys, ac mae rhai cyfrinachau’n gadael blas chwerw.

Cig a Gwaed

Dewi Prysor (Y Lolfa)

Tydi sgerbwd teuluol y Bartis ddim mewn cwpwrdd. Mae o â’i draed yn rhydd, yn gysgod ar y gorwel sy’n bygwth tarfu ar heddwch bregus y teulu. Ond tydi aduniad teuluol ddim yn rhan o gynlluniau Mani. Ddim ar hyn o bryd, beth bynnag.

Ras Ola Harri Selwyn

Tony Bianchi (Gwasg Gomer)

Am chwech o’r gloch y bore mae Beti Selwyn yn gorwedd yn farw yn ei gwely. Dyw Harri, ei gŵr, ddim yn sylwi: mae ganddo bethau eraill ar ei feddwl. Yfory bydd yn rhedeg unwaith eto yn y Bryn Coch Benefit Run. O dipyn i beth, mae diwrnod Harri’n troi’n hunllef.

Ffeithiol Greadigol

Cofnodion

Meic Stephens (Y Lolfa)

Yn Cofnodion mae Meic Stephens yn edrych yn ôl ar ei fywyd fel llenor, golygydd, swyddog Cyngor y Celfyddydau, athro prifysgol a dyn teulu. Yn y gyfrol hon cawn glywed sut y tyfodd y crwt di-Gymraeg yn Gymro Cymraeg, a chwarae rhan mor flaenllaw ym mywyd diwylliannol Cymru.

Tuchan o Flaen Duw

Aled Jones Williams (Gwasg Carreg Gwalch)

Hunangofiant gonest a chignoeth y llenor a’r dramodydd arbrofol Aled Jones Williams. Gan ddweud ei fod, o bosib, wedi hepgor y pethau pwysicaf, penderfynodd yr awdur gyhoeddi dwy bennod o hunangofiant sy’n canolbwyntio ar ddau beth: alcoholiaeth a Duw.

Yr Erlid

Heini Gruffudd (Y Lolfa)

Dyma fywgraffiad Kate Bosse-Griffiths a lwyddodd i ffoi o’r Almaen i wledydd Prydain yn 1927. Mae yma hanes o garu a chasáu, gwarchod ac erlid, dyheu a dychryn yn y cyfnod mwyaf dinistriol a welodd Ewrop erioed.

Ges i’r fraint o fynd draw i gartref Shani yn Llangadfan i weld ei gwaith newydd cyn eu bod yn gadael llonyddwch a thawelwch y stiwdio am y ‘mwg mawr’ a phrysurdeb Llundain. A’r peth cynta sy’n taro rhywun wrth gerdded i mewn i’r stiwdio ydi maint y darnau, mae nhw gymaint mwy na’r artist. Anhygoel meddwl sut mae rhywun sydd tua 5 troedfedd o uchder yn gallu peintio canfasau anferth sydd tua 8 troedfedd o hyd!

Mae’n adnabyddus am ei phortreadau o ffigyrau unigol, ond ar gyfer y gwaith newydd, mae wedi ychwanegu blodau a phapur wal patrymog. Archwilio sefyllfa’r ferch o fewn cymdeithas ydi’r thema o hyd, ac mae’r darnau newydd hefyd yn gofyn cwestiynau am y berthynas rhwng merch a’i chartref. Mae’n defnyddio’r blodau fel symbolau o rywioldeb benywaidd – yn blodeuo ac wedyn yn gwywo.

I gyd fynd â’r gwaith newydd, mae Seren wedi cyhoeddi cyfrol hyfryd, ac mae Francesca Rhydderch wedi cyfrannu at y llyfr drwy wneud cyfweliad estynedig efo Shani. Mae’r llyfr a’r arddangosfa yn cydfynd â phenblwydd go arbennig, a’r sgwrs felly yn gyfle i edrych yn ôl  ar ei bywyd, a’r digwyddiadau a’r dylanwadau hynny sydd wedi ffurfio a siapio Shani Rhys James yr artist.

Difyr iawn felly oedd cael cwmni Francesca yn y stiwdio a chael trafod y gweithiau newydd yng nghyd-destun bywyd yr artist. Mae’r berthynas rhwng Shani a’i mham wedi chwarae rôl allweddol yn ei gwaith erioed, a gan mai actores oedd ei mham, mae dylanwad y theatr yn amlwg. Y theatr yn dylanwadu ar y cyfansoddiad, llenyddiaeth ar y teitlau, a geiriau yn ychwanegu dimensiwn arall i’r cyfan. Treuliodd bron i ddeg mlynedd cynta ei bywyd yn Awstralia, ond mae’r profiad o gyrraedd Llundain yng ngaeaf llwm 1962-63 wedi dylanwadau ar y gwaith newydd. Mae’r ffaith iddi ail-ddarganfod ei thad yn ei thridegau hefyd yn codi ei ben. Haenau o ystyr y tu cefn i’r wynebau, a’r cymeriadau herfeiddiol yn cynnig cipolwg ar fyd a bywyd diddorol yr artist.

Os gewch chi gyfle, plis ewch i fwynhau a rhyfeddu ar waith newydd Shani Rhys James. Mae ganddi ddwy arddangosfa ym mis Mai, un yn Llundain (Kings Place Gallery), a’r llall yng Nghaerdydd (Oriel Martin Tinney), a bydd yr arddangosfa sy’n agor yn Llundain yn cyrraedd Aberystwyth yn yr Hydref.

Ac os da chi fel fi, yn ysu ac yn awchu i gael un o weithiau enfawr Shani yn addurno wal yn eich cartref, ella y bydd rhaid bodloni ar gael y llyfr lliwgar hyfryd ar y bwrdd coffi yn lle hynny!

O.N. Penblwydd hapus iawn i Shani yn ddiweddar! A phob lwc i Francesca efo’i nofel gynta’ – “The Rice Paper Diaries”.

Ar gyfer mwy o glipiau fideo, ewch draw i Sianel Youtube Pethe.

Ar gyfer mwy o glipiau fideo, ewch draw i Sianel Youtube Pethe.

Tanysgrifiwch ar iTunes

Neu gwrandewch yma

Wil Sam

Noson yn nhafarn Y Plu, Llanystumdwy ac fe rown y byd petawn i’n gallu mynd yno i gael peint o Ginis efo’r dyn ei hun. Ond grŵp darllen dan arweiniad Aled Jones Williams fydd yno – darllen un o’r dramau yn uchel rhyngddom ac yna ei thrafod. Nid ei thrafod fel  llenyddiaeth gymaint â thrafod ein hymateb personol i’r cymeriadau a’r stori. Y Dyn Swllt oedd drama wythnos ddiwetha a nos Fawrth yma Dinas Barhaus fydd dan sylw.

Blodyn

Mae gen i waith cyflogedig am chydig wythnosau yn trefnu’r gweithdai sy’n rhan o brosiect cymunedol y Theatr Genedlaethol ym Mlaenau Ffestiniog – llogi ystafelloedd a phethau ymarferol felly. Ond mae o hefyd yn golygu y bydda i’n cael chwarae efo paent yng ngweithdai celf Anna Fôn a dysgu am ffilm yn sgil y plant a’r bobl ifanc fydd yn mynychu gweithdai Owain Llyr.

Meic ar y Meic

Diolch byth am iplayer – mae gen i waith dal i fyny efo’r gyfres yma. Meic Stevens, eicon os bu un erioed, yn olrhain hanes canu pop Cymraeg trwy gyflwyno amrywiaeth bendigedig o ganeuon – pethau na wyddwn i ddim amdanynt a phethau sy’n wych cael fy atgoffa ohonynt (Dic Penderyn a Tich Gwilym yn rhan o’r sioe). Gyda’r nos o goginio llwyth o bethau i’w rhoi yn y rhewgell, gwydriad o win o fewn cyrraedd a gwrando ar Meic – dyna ydi’r cynllun.

Ar gyfer mwy o fideos, ewch draw i Sianel Youtube Pethe. 

Mae’n siwr mai am ei waith efo’r Super Furry Animals y mae Gruff fwya’ adnabyddus, a does dim syndod am hynny, achos yn fy marn i, nhw ydi un o’r grwpiau mwya’ creadigol erioed i ddod o Gymru. O’r albym gyntaf “Fuzzy Logic” (1996) i’r un ddiwethaf “Dark Days / Light Years” (2009), dwi ‘di bod yn dilyn eu llwyddiant hefo brwdfrydedd ac angerdd, ac wedi mwynhau gymaint o nosweithiau anhygoel yn eu cwmni. Mae eu perfformiadau byw wastad yn wych, a chael gwrando ar yr ystod eang o berlau sydd yn eu set swmpus yn bleser pur.

Mae’r Anifeiliaid Anhygoel o Flewog ‘di bod yn dawel ers blynyddoedd yn anffodus, ond braf gweld bod yr aelodau yn brysur iawn efo’u prosiectau eu hunain. Guto Pryce efo Gulp, Huw Bunford efo The Pale Blue Dots, Cian Ciaran yn gweithio ar ei ail albym unigol, ac mae Daf Ieuan ‘di bod yn brysur efo The Peth, Wibidi, a The Earth.

A Gruff Rhys? Mae o ‘di rhyddhau tair albym unigol (yr un ola’ oedd enillydd haeddiannol y Wobr Gerddoriaeth Gymreig 2011), ‘di teithio i Dde America i greu ffilmiau, a ‘di cydweithio efo amrywiaeth o artistiaid rhyngwladol. Un o’r prosiectau yma, sef Neon Neon, sy’n cael sylw Pethe yr wythnos yma.

Neon Neon ydi prosiect Gruff a’r cynhyrchydd o Los Angeles, Boom Bip. “Stainless Style” oedd yr albym gynta – albym gysyniadol am fywyd John DeLorean (y dyn oedd yn gyfrifol am greu’r car i’r ffilmiau “Back To The Future”). Pop sgleiniog perffaith, a sŵn a wnaeth sicrhau enwebiad gwobr Mercury iddynt yn 2008. Bum mlynedd yn ddiweddarach, mae’r ddau yn eu holau efo albym gysyniadol arall – “Praxis Makes Perfect” – a bywyd lliwgar y cyhoeddwr o’r Eidal, Giangiacomo Feltrinelli, sy’ dan sylw y tro yma.

Yn ogystal a rhyddhau’r albym (sydd allan Ebrill 29ain), mae Gruff a Boom Bip hefyd yn cydweithio efo National Theatre Wales er mwyn dod a bywyd Feltrinelli i’r llwyfan, ac hefo help y dramodydd Tim Price a’r cyfarwyddwr Wils Wilson, mae nhw ‘di mynd ati i greu perfformiad byw cwbwl unigryw. Dwi’n edrych ‘mlaen gymaint i weld y cynhyrchiad, ac yn dymuno’n dda i bawb sy’n rhan o’r prosiect cyffrous.

Felly ewch i wefan National Theatre Wales i sicrhau eich tocyn, ac ewch i fwynhau gig theatrig sy’n siwr o chwalu eich pen. Mentrwch i fyd Feltrinelli a Neon Neon!