Os fydd pac Toulon, gan ddibynnu ar esgid Jonny Wilkinson, yn cael ei ffordd gornest debyg fydd hon. Pam inni’n ystyried rygbi Ffrengig heddiw fel rygbi llawn dychymyg a greddf? Mae blynyddoedd o rygbi Cwpan Heineken wedi dangos, er bod rhywfaint o ddawn o hyd i’w weld yn chwarae’r timau Ffrengig, o dan bwysau, maent yn troi nôl i ddibynnu ar rym y blaenwyr.

Dyna pam dwi’n cefnogi Clermont i ennill y gêm hon. Heb amheuaeth, nhw sydd wedi dangos y rygbi gorau’r tymor hwn, gan gynnwys y Chwe Gwlad. Er iddynt fod ychydig yn sigledig yn y rownd gynderfynol yn erbyn Munster, mae Clermont wedi chwarae rygbi uchelgeisiol, ymosodol o’r cychwyn ac yn haeddu ennill y cwpan am y tro cyntaf yn eu hanes.

Rhagorol

Eu tri cefnwr sydd wedi bod fwya’ bygythiol ac mae hynny’n tanlinellu eu hathroniaeth ac wrth galon y triawd mae’r Cymro, Lee Byrne sydd wedi bod yn rhagorol.

Mae’r ffaith nad yw Byrne wedi cael ei ddewis i chwarae i Gymru eleni’n tanlinellu pa mor wych mae Halfpenny wedi bod ac, yn ail, mae’n dangos bod chwaraewr yn dueddol o gael eu hanghofio pan nad ydyn nhw’n ffitio yng nghynlluniau Gatland a’i griw o hyfforddwyr.

Mae Liam Williams yn chwaraewr da ac efallai bod ganddo ddyfodol disglair, ond ni fuasai’n ennill y blaen ar Byrne yn nhîm cychwynnol Clermont.

Nodweddion

Er iddyn nhw chwarae rygbi da, methodd chwaraewyr eraill fel Peel a Hook i greu argraff hefyd. Unwaith mae’r penderfyniad wedi ei wneud, mae’n ymddangos bod cael eich lle yn ôl yn gamp anodd.

Dwi ddim o’r farn bod unrhyw beth milain wrth wraidd eu gadael allan. Yn wir dwi’n credu bod yna nodweddion sy’n amlwg i hyfforddwyr yn unig wrth weithio gyda chwaraewyr. Wedi’r cyfan, mae Gatland wedi cael llwyddiant rhyfeddol yn sgil y chwaraewyr mae o wedi eu dewis, a’r ffordd o chwarae mae wedi ei fabwysiadu. Mae wedi ennill yr hawl i ddewis pwy bynnag mae’n dymuno.

Dyna’r rheswm pam oedd dewis Dylan Hartley ar gyfer y Llewod yn dipyn o syndod imi. Mae Gatland wedi gwneud ambell sylw pigog am y bachwr ac eto mae’r Sais (o ryw fath) wedi ei ddewis o flaen Rory Best.

Ond dwi ddim yn rhy barod i feirniadu, oherwydd gan amlaf, Warren sy’n gwybod orau.

Bydd cyfle i weld Pontypridd yn herio un o dimau’r gorllewin yn rownd derfynol Cynghrair y Principality yn fyw ar S4C nos Sadwrn, 18 Mai, gyda’r gic gyntaf am 7.00 o’r gloch.

Sarra Elgan fydd yn cyflwyno Rygbi: Rownd Derfynol Cynghrair y Principality gyda Derwyn Jones yn y stiwdio ac adroddiadau o’r llinell gan Rhodri Gomer Davies.

Bydd y gêm gynderfynol rhwng Llanelli a Llanymddyfri yn cael ei chwarae wythnos yng nghynt – gêm fydd yn penderfynu pwy fydd yn wynebu Pontypridd yn Heol Sardis yn y ffeinal.

Pontypridd a Llanelli gyrhaeddodd rownd derfynol y Principality y llynedd gyda Ponty’n ennill. Nhw hefyd sydd wedi gorffen ar frig y gynghrair eleni gyda 96 o bwyntiau – 23 pwynt yn uwch na’r tîm yn yr ail safle – Llanymddyfri. A Phontypridd oedd yn fuddugol hefyd yn rownd derfynol Cwpan Swalec eleni ar ôl curo Castell-nedd.

Ar bapur felly, Pontypridd yw’r ffefrynnau i ennill eto nos Sadwrn. “Ond mewn gêm unigol, bwysig fel hon gall unrhyw beth ddigwydd,” meddai Rhodri Gomer Davies.

Llanymddyfri oedd clwb cyntaf Rhodri fel chwaraewr dros ddeng mlynedd yn ôl cyn iddo fynd ymlaen i chwarae dros Northampton, y Dreigiau a’r Scarlets. “Mae gan Lanelli dîm ifanc talentog ac maen nhw’n dueddol o chwarae rhai o’r Scarlets ifanc yn eu prif gemau,” meddai Rhodri. “Ond y peryg, efallai, yw na fydd aelodau’r tîm yn gyfarwydd â chwarae gyda’i gilydd ac mae’n bosib felly y bydd Llanymddyfri’n fwy profiadol yn chwarae fel tîm.

“Mae Llanymddyfri wedi datblygu tipyn yn y ddwy neu dair blynedd ddiwethaf gyda chwaraewyr ifanc disglair yn eu plith – fel y mewnwr, Rhodri Williams a’r cefnwr Lee Rees – yn ogystal â chwaraewyr profiadol fel y bachwr Adam Yelland a’r prop Andrew Jones.

“Mae Cynghrair y Principality yn hanfodol i ddatblygiad y gêm yng Nghymru,” meddai Rhodri. “Gyda chymaint o chwaraewyr ifanc yn dod trwy academi’r undeb, mae’r safon yn gwella ac mae gemau’r gynghrair yn rhoi cyfle arbennig i arddangos y doniau sydd ar gael.”

Ar benwythnos lawn o rowndiau terfynol y byd rygbi, bydd S4C yn dangos uchafbwyntiau Ffeinal Cwpan Heineken yn y rhaglen Cwpan Heineken hefyd nos Sadwrn. Cystadleuaeth rhwng dau dim o Ffrainc fydd rownd derfynol Cwpan Heineken gyda Clermont yn herio Toulon yn Nulyn. Gareth Roberts fydd yn cyflwyno.