Shân Cothi
Cyfres newydd o gân, cerddoriaeth a sgwrs. Y diva Shân Cothi sy'n croesawu rhai o'n talentau cerddorol mwyaf i'w sioe serennog.
Yn y rhaglen gyntaf o'r gyfres Shân Cothi, y bas-baritôn byd-enwog Bryn Terfel fydd un o'r gwesteion wrth i'r gantores fyrlymus fynd â ni ar daith gerddorol gyffrous, o'r byd opera a cherddoriaeth glasurol i alawon Cymreig a chaneuon o'r sioeau cerdd.
Bydd gwesteion arbennig yn ymuno â'r soprano o Ffarmers bob wythnos i ganu a sgwrsio ac mae'r rhain yn cynnwys Elin Manahan Thomas, Only Men Aloud!, Rhys Meirion, Catrin Finch, Connie Fisher a Rebecca Evans ymhlith eraill.
Does neb mwy arbennig na'r cawr cerddorol o Bant-glas, Gwynedd a fydd yno i ganu'r hen ffefryn, Cariad Cyntaf.
"Wy'n nabod Bryn ers y dyddiau 'nny pan oedden ni'n cystadlu mewn eisteddfodau yn ein harddegau," meddai Shân, a fu'n aros gyda Bryn yn Llundain am gyfnod.
"Mae e'n gymeriad mor arbennig. Mae 'da fe bersonoliaeth fawr, llais mawr, ond yn fwy na dim, mae 'da fe galon fawr," ychwanega'r gantores a chwaraeodd ran Davina yn y ddrama boblogaidd, Con Passionate ar S4C.
Bydd Bryn hefyd yn rhannu ychydig o'i brofiadau wrth deithio'r byd yn canu mewn operâu a chyngherddau, yn ogystal â siarad am ei hobïau.
"Allwn i siarad â Bryn drwy'r dydd am Wagner ond wy'n gwybod mai dim ond crybwyll golff a gwin da sy' ei angen ac mae e wrth ei fodd yn cael siarad," meddai Shân, a fydd yn cael gwers pytio pêl golff gan Bryn ar y rhaglen.
Gwestai arall ar y rhaglen fydd y drwmpedwraig Alison Balsom sy'n perfformio fersiwn arbennig iawn o ddarn lleisiol Vocalise gan Rachmaninov. Mae Alison yn un o gerddorion mwya' disglair Prydain, sydd wedi ennill gwobr Perfformiwr Ifanc Gorau yn y Classical Brits a Gwobr y Gwrandawyr ar Classic FM.
Fe fydd enillwyr Côr Cymru 2005, Serendipity, dan arweiniad arweinydd Only Men Aloud! Tim Rhys-Evans yn ymuno â Shân i ganu dwy gân o'r opera Ffrengig, Carmen. A byddant yn ymuno â Shân, Bryn a'r band glam rock Tigertailz, i berfformio fersiwn gwefreiddiol o'r gân I Believe, a lansiodd Amser Justin Time y llynedd, yr elusen er cof am ddiweddar ŵr Shân a fu farw o gancr y pancreas.
