Fel byngalo dormer, mae rhywfaint o risiau yn Llys-y-gwynt, Cwm Tawe. Ond mae'r perchnogion Tom a Jean Rees yn hapus fel y gog yn eu cartref hunanadeiladu. Camwch dros y rhiniog, ac fe gamwch yn ôl i oes aur adeiladu byngalos - y 1960au a'r 1970au. Er i'r gwaith adeiladu ddod i ben ym 1968, roedd Tom a Jean wedi eu plesio cymaint gyda'r cyfan fel nad oes fawr ddim wedi newid ers hynny. Os mai ceginau melamin a charpedi seicadelig sy'n mynd â'ch bryd chi, fe fyddwch chi wrth eich bodd yn Llys-y-gwynt!