Mae'n bosib mai capeli yw'r adeiladau anoddaf i'w troi'n gartrefi, ond mae Capel Maentwrog www.maentwrog.com yn enghraifft glodwiw o sut i wneud hynny'n llwyddiannus. Mae'r penseiri o Wlad Pwyl, Sylvia a Peter Dennis wedi cael hwyl garw ar addasu'r hen adfail amlwg hwn uwchben yr A487 rhwng Trawsfynydd a Phorthmadog. Er bod gen i deimladau cymysg braidd am addasu hen adeiladau crefyddol yn gartrefi, mae'r lle gwych hwn yn llwyddo i ddal naws ysbrydol a heddychlon yr hen gapel i'r dim.