Mae Llys Hynafol Cochwillan ger Tal-y-bont, Bangor yr un mor drawiadol o hardd heddiw ag yr oedd yn y 1400au. Fe welwch chi bobl yn cerdded i mewn yn hollol geg agored wrth droi eu golygon tua'r to trawst gordd sy'n debyg i'r un yn Neuadd Westminster.

Os yw'n dal i'n rhyfeddu ni heddiw, a ninnau wedi hen arfer gweld adeiladau uchel a pheirianwaith cymhleth, yna dychmygwch beth oedd ymateb pobl y 15g wrth weld y muriau'n fôr o dapestrïau a darluniau cain. Siawns na fyddai'r un enaid byw yn amau grym y siryf lleol, a'i gartref yn ail agos i dŷ Duw. Yn wir, byddai'r crefftwyr hynny oedd yn gyfrifol am greu'r toeon derw trawiadol a chain hefyd wedi gweithio ar eglwysi a chadeirlannau'r oes.