Byddwn yn bwrw golwg ar chwaeth uchelwyr Cymru yng nghyfrol yr wythnos hon o’r Ty Cymreig, gan edrych ar amrywiaeth o dai mawr gwledig. Cawn weld sut newidiodd ffasiynau dros bedair canrif, a bydd eu tai yn datgelu llawer am feddyliau’r perchenogion cyfoethog.

Plas Brondanw yw’r plasty sy’n cynrychioli’r gorau o agweddau’r 20fed Ganrif, er bod yr adeilad yn dyddio nôl i’r 1660au. Fodd bynnag, yn dilyn tân dinistriol ym 1951 bu’n rhaid i’w berchennog, y pensaer ysbrydoledig Clough Williams-Ellis, adnewyddu’r ty’n gyfangwbl. Ymdrechodd yntau i gasglu nodweddion â chanddynt nifer o ddylanwadau er mwyn creu cyfanwaith unigryw.