Chwedeg blynedd cyn i Laurence Llewellyn-Bowen ymddangos ar ein setiau teledu gyda’i syniadau theatrig i fywiogi ystafelloedd cyffredin, roedd Clough Williams Ellis yn rhagflaenu mewn cornel dawel o Ogledd-Orllewin Cymru. Fel un a oedd yn dilyn athroniaeth y mudiad "Arts & Crafts", a oedd yn caniatáu pob rhyddid i’r pensaer i greu gweithiau rhamantaidd, roedd Clough yn benderfynol o gael hwyl â’i gynlluniau. Mae ei waith yn rhagorol er iddo gael agweddau fwlgar ac yn atyniadol yn ogystal â thrawiadol. Roedd Clough yn bencampwr yn ei ddull o ddewis a dethol manylion amrywiol i’w cymysgu at ei gilydd – megis plentyn mewn siop losin yn dewis ei ddanteithion ‘pick and mix’. Yn y dyddiau hyn mae athroniaeth adnewyddu yn mynnu bod yn rhaid aros yn driw i’r cyfnod, gyda tu-fewn y tŷ yn gweddu at ei gilydd. Fodd bynnag, agwedd Clough oedd "Os mae’n edrych yn dda, gewn ni wneud e", sy’n golygu bod ei steiliau’n torri pob rheol yn llawlyfr y cynllunwyr cyfoes!

Yn dilyn tân dinistriol ym Mhlas Brondanw ym 1951, a adawodd y waliau ar y tu-allan yn sefyll ond bron dim byd arall, fe aeth Clough ati i adnewyddu’i dy gan ddefnyddio defnyddiau a darnau allan o ddwsinau o dai hanesyddol. Roedd hyn ddigon anarferol mewn cyfnod pan oedd pobl ar draws Prydain yn brysur yn diweddaru adeiladau Sioraidd a thai hen eraill a oedd wedi’u niweidio yn ystod y rhyfel, a’r tuedd oedd i losgi’r deunydd a ddaeth allan o hen dai. Roedd Clough yn ddyn prysur, gan brynu colofnau, porticos, rheiliau ac unrhywbeth a allai addurno’i dy. Yna cafodd y rhain eu gosod ym Mhlas Brondanw mewn ffordd unigryw ac heb boeni o gwbl am beth fyddai cynllunwyr caeth yn meddwl o’r gybolfa. Felly mae colofnau clasurol yn sefyll nesaf at waith plastr rococo a drysau Sioraidd yn agor i fewn i ystafelloedd oes jazz.

O fewn dwy flynedd roedd y cyfan yn barod ac roedd Clough wedi llwyddo i greu golwg ar y tu-fewn sy’n ysbrydoli ac yn diddanu. Gellir gweld ôl y cynllunydd ym mhob cwt a chornel, ac er i lawer o’r darnau unigol ymddangos fel eu bod dros ben llestri, fel cyfanwaith mae’r cyfuniad yn deilwng o athrylith.