Fe ymwrthododd y Fictoriaid â rheolau caeth cynllunwyr yr oes Sioraidd, ac yn eu lle fe greon nhw ffasiynau newydd. Roedd eu steiliau yn fwydrus â manylion organig yn perthyn iddynt. Tra bod y bobl gefnog a ystyriai eu hunain yn fonheddig yn para i adeiladu cartrefi yn y dull clasurol, roedd y dosbarth canol newydd yn dewis steiliau neo-Gothig, a oedd i fod i atgoffa rhywun o oes aur gyn-ddiwydiannol.

Efallai fod y tai ychydig yn ddi-chwaeth, yn anghymesur ac yn anghyson, ond fe aeth y steiliau hyn ar draws y wlad, gan wneud argraff pellgyrhaeddol ar olwg ein trefi. Yr arwyddair oedd ‘pastiche’, ac felly gellid gweld nodweddion rhyfedd yn nhai crand y maestrefi, fel dylanwadau o Tsiena neu’r mudiad "Celf a Chrefft", neu agweddau clasurol neu neo-Gothig – y cyfan yn yr un tŷ! Roedd busnesau cynllunio mewnol yn ffynnu, y dosbarthau canol yn tyfu’n gyflym, a ffatrïoedd yn creu cynlluniau a oedd wedi’u masgynhyrchu gan beiriannau, gan olygu eu bod o fewn cyrraedd llawer o bobl am y tro cyntaf.

Mae tref Llandudno yn enwog am harddwch y cannoedd o adeiladau Fictoraidd, sy’n darparu cefndir prydferth i fireinder naturiol y lleoliad. Fodd bynnag, nid yw’n hawdd i ddod o hyd i dy yn ei gyflwr Fictoraidd gwreiddiol, ac felly roeddem yn ffodus ein bod yn gallu ymweld ag Osborne House, tŷ crand a enwyd ar ôl cartref Victoria ei hunan ar Ynys Wyth. Dros nifer o flynyddoedd mae adfer gofalus wedi sicrhau bod y tŷ yn dychwelyd i edrych fel palas, fel yr oedd y pensaer wedi bwriadu.

Er nad oes unrhywbeth arbennig am olwg allanol y tŷ, â’r gwaith maen sy’n nodedig o ddiwedd y 19eg Ganrif, mae’n stori arall ar y tu fewn. Bellach mae’r adeilad yn westy moethus, ac mae’n llawn gwaith pren goreuraidd, siandelïers crisial a dodrefn drud. Mae’n edrych ac yn teimlo fel petai boneddigion oes Victoria dim ond newydd ymadael â’r ystafell.

Prif ddyletswydd ystafelloedd derbyn yn oes Victoria oedd i greu argraff dda ar y gwesteion, a does dim dwywaith bod Osborne House yn cyfleu naws o foethusrwydd i’r ymwelwyr. Mae’r waliau’n dywyll i gyd, y ffenestri wedi’u gorchuddio gan les a’r ystafelloedd wedi’u gorlenwi â dodrefn – yn union fel y bydden nhw yn y 19fed Ganrif. Yn y cypyrddau arddangos mae creiriau sydd wedi’u casglu tramor ac ar y waliau mae paentiad olew, sy’n ymddangos fel eu bod wedi bod yn y teulu ers cenedlaethau. Mae teimlad o olud a gormodedd yn yr ystafelloedd sy’n gorlwytho synhwyrau’r ymwelydd. Ceir yma foethusrwydd teilwng o balas, wedi’i cywasgu i fewn i gartref ar gyfer y dosbarth canol – sef yn union beth oedd rhinwedd cynlluniau Fictoraidd.