Y gyflwynwraig Nia Parry yn hel atgofion am Landudno

Dwi wrth fy modd efo Llandudno fel fy nhref lleol i. Dyma’r dre dwi’n ystyried fel gartre. Ar ôl byw yn ne Cymru ers sawl blwyddyn bellach, does dim byd yn well gen i na gyrru i Landudno a gweld yr arwydd yn fy nghroesawu - “Llandudno Welcomes You” fel pe bai wedi ei roi yno yn unswydd ar fy nghyfer i.

Symudon ni fel teulu i Landrillo yn Rhos, nid nepell o Landudno, o Sir Fôn pan o'n i'n bump oed ac mae gen i atgofion lu o blentyndod hapus iawn ar lan y môr. Ar y prom ddysgais i i reidio beic ac yno fyddai’r ysgol yn cynnal ras hwyl a ninnau fel ffyliaid gyda’n ‘roller boots’ ar garlam hyd y prom. Ar y traeth y byddwn yn marchogaeth ceffyl hefyd.

Y môr yw’r apêl fwyaf – mae na rhywbeth sy’n llonyddu’r enaid am weld y gorwel, yn enwedig os 'dach chi wedi ei weld o’n ddyddiol ar hyd eich oes. Ar ôl treulio amser yn y ddinas, mae 'na hiraeth yn dod drosta i i weld rythm y don unwaith eto.

Y ffordd orau i werthfawrogi’r dre yn fy nhŷb i yw drwy ddringo Trwyn y Fuwch (neu’r ‘Little Orme’ fel ei gelwir yn lleol) neu’r Gogarth ochr draw er mwyn gweld y dre yn ei gogoniant.

Ac am dref! Ac am le braf i ddod am wyliau! Roedd yr hen ddywediad Saesneg “make hay while the sun shines” yn wir i mi bob haf gan mai gweld yr ymwelwyr fel cyfle i wneud pres fyddwn i.

Byddwn yn neud ‘shifft’ brecwast mewn un gwesty cyn mynd ymlaen i’r ‘Cambridge Restaurant’ ar Stryd Mostyn i weini bwyd amser cinio. Er bod dewis hirfaith ar y fwydlen mynd am y ‘sbesial’ fyddai’r cwsmeriaid bob tro. Am £4.50 byddai modd cael cinio cig oen, bîff, pei stêc neu bysgod. Gan fod diffyg arian mân yn y til byddwn yn derbyn papur pum punt ynghyd â’r llinell “keep the change, love” yn ddi-ffael. Bargen! Roedd fy mrawd yn golchi llestri yn y gegin ac yn herian fy mod i yn elwa gymaint oherwydd fy ngwên lydan! Ar ôl y shifft cinio ymlaen â fi i westy arall i neud y shifft swper mewn gwesty glan môr arall .

Gyda phres yn fy mhoced roedd gofyn mynd allan i fwynhau. Ac o fyw yn union rhwng Llandudno a Bae Colwyn rhaid oedd dewis yn reit ifanc os am fod yn ‘Du dno girl’ neu ‘Bay girl’. Dewis syml i mi oedd Llandudno dros Fae Colwyn. Felly bob nos Wener a nos Sadwrn mi fyddwn i a’m ffrindiau ysgol yn heidio i far gwin ‘Bartons’ yn meddwl ein bod yn smart.

Byddai’r noson yn diweddu'n ddi-ffael yn y ‘Bouli’ (y Broadway Boulevard). Y jôc ydy ein bod ni’n dal yn mynd yno pan 'dan ni’n dod at ein gilydd, ond y tro hyn yn dewis y noson i’r ‘over 25’s’ ar nos Fercher er mwyn osgoi’r plant yn eu harddegau!