Cerys ac Afon Mississippi
Bydd taith y gantores garismatig Cerys Matthews yn dechrau yng nghanol Unol Daleithiau America, yn Cairo, Illinois, cyn symud i lawr trwy daleithiau'r de at ddelta enwog yr afon yn Louisiana. Daeth Cerys i nabod rhannau o Afon Mississippi pan oedd hi'n byw yn Nashville, Tennessee, dros gyfnod o chwe blynedd. Ond dyma gyfle iddi ddeall mwy am bobl y Mississippi, a mwynhau harddwch yr afon ei hun.
"Mae'r Mississippi'n sbesial iawn," meddai Cerys. "Mae gan yr afon 'ma ryw hud arbennig sy' wedi fy swyno i ers blynyddoedd, ers i mi ddechrau chwarae'r blues ar y gitâr pan o'n i'n naw oed, siŵr o fod."
Mwy »
Tipyn o bererindod felly yw mynd i gwrdd â David Honeyboy Edwards, yr unig un o'r Delta Bluesmen sy'n fyw o hyd. Yn 92 mlwydd oed, cafodd ei fagu yn y planhigfeydd cotwm. Ac yn ôl Honeyboy mae caneuon y blues yn deillio o'r holler songs, caneuon y caethweision - fel ei dad-cu ei hun - wrth iddynt weithio oriau hir yn yr haul crasboeth. A heb fawr o brotest dyma Honeyboy yn cyfeilio i ganu Cerys, gan greu un o uchafbwyntiau'r daith.
Ym Memphis hefyd, mae atgofion melys a chwerw. Y ddinas hon oedd lleoliad prif farchnad caethweision y byd, ond yn ddiweddarach daeth yn gynefin i B.B. King, Otis Redding, Johnny Cash, Roy Orbison a'r brenin ei hun, Elvis Presley.
"Mae diwylliant cyfoes yr Unol Daleithiau mor gyfarwydd i ni ym Mhrydain ar un olwg," meddai Cerys. "Ond mae yna ddiwylliant mwy egsotig dan wyneb y Mississippi. Mae'n ddiwylliant cyfoethog, amryliw ac mae e hefyd yn hanesyddol bwysig.
"Y peth grêt am wneud rhaglen yw eich bod chi'n cael cyfle i wneud pethau na fyddech chi'n wneud wrth deithio ar ben eich hun. Ges i hedfan dros yr afon i gael golwg ar y levees; ges i bysgota shrimp yn y bayous a mynd i barti gyda'r Cajuns, ac ro'n i'n cwrdd â chymeriadau arbennig bob dydd. Ges i brofiadau gwych."
« Llai
Erthygl Sgrîn Hydref 2008
"Miss Matthews a'r Mississippi"
Ewch i wefan Sgrîn i lawrlwytho'r cylchgrawn
