08/06/2011
Bu Huw Jones yn Brif Weithredwr S4C am bron i 12 mlynedd, rhwng 1994 a 2005, yn dilyn gyrfa lewyrchus fel cynhyrchydd teledu annibynnol, gŵr busnes a pherfformiwr. Yn ystod ei gyfnod fel Prif Weithredwr S4C, fe gadeiriodd Huw Jones is-gwmni masnachol y Sianel a bu'n Gyfarwyddwr SDN Cyf, deiliad trwydded deledu ddigidol ddaearol. Bu'n Gadeirydd yr Ŵyl Cyfryngau Celtaidd am dair blynedd hefyd.
Mae Huw wedi bod yn flaenllaw yn y byd cerddoriaeth a chyfryngau Cymraeg ers y 1960au hwyr. Roedd yn un o gyd-sylfaenwyr Cwmni Recordiau Sain ac yn Rheolwr y cwmni hyd at 1981. Cyd-sefydlodd un o'r cwmniau teledu annibynnol cyntaf, Teledu'r Tir Glas, yng Nghaernarfon, yn 1981 gan gynhyrchu a goruchwylio rhaglenni adloniant, ffeithiol a phlant nes iddo ymgymryd â'i swydd yn S4C. Chwaraeodd ran allweddol yn sefydlu Barcud, y cwmni adnoddau teledu, ac roedd yn Gadeirydd y cwmni rhwng 1981-1993. Huw oedd Cadeirydd cyntaf Teledwyr Annibynnol Cymru (1984-1986).
Magwyd Huw yng Nghaerdydd. Astudiodd Ieithoedd Modern yng Ngholeg Iesu, Rhydychen. Daeth yn adnabyddus yn gyntaf oll fel canwr poblogaidd a chyflwynydd rhaglenni teledu. Ar hyn o bryd, Huw yw Cadeirydd Portmeirion Cyf ac Is-Gadeirydd Bwrdd Cyflogaeth a Sgiliau Cymru. Mae'n aelod o Fwrdd yr Iaith Gymraeg, Cyngor RSPB ac mae'n Is-Gadeirydd Canolfan Dysgu Iaith Nant Gwrtheyrn.
07/12/2010
Mae gan Rheon gefndir ym myd cyfrifeg a rheolaeth ariannol gyda chymwysterau CPFA. Mae ganddo brofiad ariannol yn y sector gyhoeddus a phreifat ac wedi bod yn gysylltiedig am flynyddoedd gyda nifer o fyrddau a phwyllgorau archwilio, gan gynnwys cyfnod tra'n gweithio fel Cyfarwyddwr i gwmni Deloitte & Touche LLP.
Yn 2005 sefydlodd gwmni ymgynghori ar gyfer nifer craidd o gwsmeriaid ar reolaeth ariannol, datblygiadau ym maes effeithiolrwydd ac aseiniadau trefn lywodraethol. Ar hyn o bryd mae'n Gadeirydd CIPFA yn Ne Cymru ac yn aelod o Gyngor Rhanbarthol y Sefydliad. Mae'n Drysorydd Urdd Gobaith Cymru.
Rheon yw Cadeirydd Pwyllgor Archwilio a Rheoli Risg Awdurdod S4C. Cyn ei benodi'n Is-Gadeirydd bu'n aelod o'r Awdurdod ers 20/11/2006.
16/07/2007 - 15/07/2011
Mae gan Bill 40 mlynedd o brofiad ym maes rheolaeth personél ac adnoddau dynol yng Nghymru. Ef oedd Cyfarwyddwr Personél Cyngor Gwynedd am dros 10 mlynedd, ac ar hyn o bryd ef yw Rheolwr Personél Gyrfa Cymru Gogledd Orllewin. Gweithiodd i Awdurdod Dŵr Cymru fel Rheolwr Personél dros Ogledd Cymru a chyn hynny roedd yn Swyddog Cysylltiadau Gweithwyr yng Ngwaith Dur Port Talbot.
Mae Bill yn Aelod Lleyg yn Gynrychiolydd Cyflogwyr ar y Gwasanaeth Tribiwnlys Cyflogaeth, ac yn Asesydd Annibynnol i Gynulliad Cenedlaethol Cymru. Mae'n gadeirydd Panel Personél Urdd Gobaith Cymru, ac yn Aelod Siartredig o'r Sefydliad Siartredig Personél a Datblygiad.
Mae hefyd yn gyfarwyddwr Bryn Llifon, Cartref y Bedyddwyr yn y Gogledd. Bill yw Cadeirydd Pwyllgor Personél a Chydnabyddiaeth Awdurdod S4C.
16/07/2007 - 15/07/2011
Mae Cenwyn wedi dal nifer o swyddi uwch yn HTV gan gynnwys Rheolwr Rhaglenni Ffeithiol, Rheolwr Cynyrchiadau Gogledd Cymru a Phennaeth Materion Cyfoes. Dechreuodd ei yrfa fel gohebydd newyddion a newyddiadurwr gwleidyddol. Ar ôl 20 mlynedd yn HTV symudodd i S4C fel Pennaeth Cyd-gynhyrchu a Golygydd Comisiynu Ffeithiol gyda chyfrifoldeb gweithredol dros S4C2 a materion gwleidyddol.
Yn fwy diweddar bu'n Gyfarwyddwr Teledu gyda grŵp cwmnïau Tinopolis ac arweiniodd ddatblygiad strategol y cwmni, gan ymgorffori cynhyrchu teledu, gweithgareddau rhyngweithiol a chyfryngau newydd.
Ar hyn o bryd mae'n gweithredu fel Ymgynghorydd Cyfryngau ar gyd-gynyrchiadau rhyngwladol. Mae Cenwyn yn aelod o Bwyllgorau Archwilio a Rheoli Risg a Phersonél a Chydnabyddiaeth Awdurdod S4C.
20/04/2009 - 19/04/2013
Mae Dyfrig Jones yn darlithio yn yr Ysgol Astudiaethau Creadigol a'r Cyfryngau ym Mhrifysgol Bangor, yn arbenigo mewn Ymarfer a Theori'r Cyfryngau. Mae ei ddiddordebau ymchwil yn cynnwys ffilmiau a rhaglenni dogfen, theori cynhyrchu, polisi'r cyfryngau, a chomics.
O fis Tachwedd 2006 i Fawrth 2009 ef oedd golygydd cylchgrawn Barn, a chyn hynny bu'n gweithio fel cynhyrchydd-gyfarwyddwr gyda Ffilmiau'r Bont, wedi ei leoli yng Nghaernarfon.
Mae hefyd yn gynghorydd Plaid Cymru yn cynrychioli ward Gerlan ar Gyngor Gwynedd. Mae Dyfrig yn aelod o Bwyllgorau Cynnwys ac Archwilio a Rheoli Risg Awdurdod S4C.
01/04/2010 - 31/03/2014
Wedi graddio mewn llenyddiaeth Gymraeg yng Ngholeg Prifysgol Aberystwyth fe barhaodd Glenda ei hastudiaethau drwy astudio Cymraeg Canol yn Aberystwyth, a oedd yn cynnwys cyfnod o amser yng Ngholeg St Ioan yng Nghaergrawnt, cyn derbyn ei doethuriaeth yn 1990 o Goleg Prifysgol Cymru. Wedi gweithio ym myd darlledu am dros 20 o flynyddoedd fe dreuliodd Glenda 15 mlynedd yn gweithio i'r BBC yng Nghaerdydd yn yr Adran Cynhyrchu Teledu - 10 mlynedd fel Uwch Gynhyrchydd i'r Gorfforaeth gan weithio yn y diwedd fel Prif Gynorthwyydd i Gyfarwyddwr BBC Cymru.
Yn 2000 fe fentrodd i weithio ar liwt ei hun ym maes cyfryngau a chyfathrebu a gweithiodd ar nifer o brosiectau rheoli a chynhyrchu. Bu Glenda yn aelod o Bwyllgor Rheoli BAFTA Cymru (2000-2006), gan gadeirio'r Pwyllgor (2003-2005).
Glenda yw Cadeirydd ymddiriedolwyr Cronfa Goffa Ryan Davies. Yn ystod y pum mlynedd ddiwethaf mae Glenda wedi cynyddu ei gwaith yn y maes hyfforddi a hyrwyddo ar gyfer cleientiaid yn y sector breifat a chyhoeddus ac yn ddiweddar fe gymhwysodd fel arolygydd lleyg Estyn. Mae Glenda yn aelod o Bwyllgor Cynnwys a Phwyllgor Cwyion a Chydymffurfiaeth Awdurdod S4C.
01/04/2010 - 31/03/2014
Y Cynghorydd John Davies yw Arweinydd Cyngor Sir Benfro. Cyn hynny roedd yn aelod o gabinet yr Awdurdod gyda chyfrifoldebau dros Blant, Addysg a'r Iaith Gymraeg mewn cyfnod o newid mawr yn y Sector Addysg Gynradd yn Sir Benfro. Mae hefyd yn gyn gyfarwyddwr bwrdd arholi CBAC a Chyngor Llyfrau Cymru.
Am naw mlynedd ef oedd y llais gwledig ar Gyngor Defnyddwyr Trydan ac yna daeth yn aelod o Golwg ar Ynni Cymru. Yn ogystal mae John yn gyn Ddirprwy Lywydd Cymdeithas Llywodraeth Leol Cymru a gwasanaethodd am nifer o flynyddoedd fel ei llefarydd dros Addysg a Dysgu Gydol Oes. Ers 2008 ef yw Arweinydd Cymdeithas Llywodraeth Leol Cymru.
Rhwng 2004 a 2008 roedd yn aelod o banel cynghori gweinidogaethol Llywodraeth y Cynulliad dros Safonau Ysgolion a Gwelliannau a tan 2008 fe gynrychiolodd Cymru ar y Corff Cyflogwyr Cenedlaethol ar gyfer Athrawon Ysgol. Mae'n aelod o Awdurdod Heddlu Dyfed Powys. Mae John yn aelod o Bwyllgor Cynnwys a Phwyllgor Archwilio a Rheoli Risg Awdurdod S4C.
01/09/2004 - 31/08/2012
Mae Winston yn gweithio fel bargyfreithiwr, ac fe'i penodwyd yn Gwnsler y Frenhines yn 1986. Mae ar hyn o bryd yn Arweinydd Cylchdaith Cymru a Chaer.
Cafodd ei benodi yn Gwnsler Cyffredinol, Cynulliad Cenedlaethol Cymru yn 1998 am gyfnod o bum mlynedd a chafodd ei anrhydeddu fel Cymrawd Urdd y Baddon (CB) ac fel aelod o'r Orsedd yn 2004.
Mae'n Gymrawd ac Is-Lywydd, Prifysgol Aberystwyth. Bu'n aelod o'r Comisiwn Teledu Annibynnol (ITC) am gyfnod cyn ei benodi i'r Cynulliad. Winston yw Cadeirydd Pwyllgor Cwynion a Chydymffurfiaeth Awdurdod S4C.
